Zot i ansouvien lo tan demoun té i sar rod dolo kisoi èk in rozoir, kisoi èk in bak, kisoi ankor dann fèr-blan. In fèr-blan sé in bak, son baz lé karé épi la tir la kouvèrtir par dsi. La plipar d’tan téi mète in shonbli dsi la tèt épi par dsi i mète in fèr-blan ranpli èk dolo. Arzout èk sa pou ké lo lo i vol pa téi mète in bouchonn fèye vèr par an dsi lo lo. Plin li té i fé pa dézord, zis inn-dé klouk-koulouk mé vid li téi fé dézord : in dézod la tol sinploman. Ala pou lo sans prop, mé lo sans figiré ? Sinploman pou asplik sak la poin arien pou dir sé li k’i koz pli for : vid pars la pèrsone na poin arien pou dir, lo brui pars li asome aou avèk in kantité kozman san ki ni tèt. Sa lé vré, in pé partou dsi la tèr é sé sa ké nout kozman zordi i vé dir.