Médam zé méssyé, la sossyété koz èk mwin sé koz èk in kouyon, mé sé o pyé d’lo mir k’i oi lo masson.

Mézami, zot i koné la vi an sossyété, la pa in pti vi trankil é bande zabizèr lé pa tro loin-défoi i sifi kass lo koin pou trouv azot fass-a-fass. Koméla i apèl sa in l’arnake é natirèlmman lo mo arnaké, épi arnakèr la rante dann noute vokabilèran bolide.

Konm i di la sossyété la pa in rassanbloman bande bizounours pars lé pa rar trouv dsi son shomin demoune pou fé in zé d’ki doublé d’in zé d’ponp avèk sak i kroi ankor Pèrnoèl. Mé antanssion, nout toute i kroi sak l’atrape lé zot, i trape ar pa nou. Dsi mon fron lé pa marké kouyon kantmèm !!! mé élass Ménélass mon kèr lé an filass, lé marké mé avèk in l’ankr invizib ;Alor, antanssion !

Alé ! mi kite azot rofléshi la dsi é ni rotrouv pli d’van, sipétadyé.