Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

Fèr konm Paul Vergès san Paul Vergès ? Ala kékshoz la pa sinp

vandrodi 9 zwiyé 2021, sanm Justin

Mézami, na dé troi zour mwin la lir dann nout zoinal in tribine d’in moune i di i fo fé la mézon dé sivilizassion é linité rényonèz. Bien sir mwin lé pour in lidé konmsa, pars dopi lontan mwin la rèv d’in zoutiy kiltirèl konmsa pou nou rényoné, pou toute sak va vizite noute péi, pou in pé toulézaz mé sirtou pou noute zénèss, épi la zénèss i vienaprann noute péi, son pèp, son kiltir épi son sivilizassion.

Mé, sa i vé pétète pa dir ni souète ropran toute bande projé dann tan Paul Vèrgès té prézidan épi fé sorte azot dann karton pou arrante dann la réalité. Pou kossa mi di sa ? Pars dopi Paul Vergès lo tan la shanjé, lé finanss lé pi sak zot lété-an bone santé dann tan. Arzoute èk sa bande nouvo zirzanss dann in lépok la tranzission ékolozik épi la transparans dann lé finanss.

La parl galman in odite pou La Réjyon, lo bande projé, léta d’lé finanss, épi galman in bilan ékolozik. Kan nora fé se lodite la lé possib – mi di pa néna – i trouv ankor ladan in bande trikmardaz, kalité monstre sète tète konm pé s’fèr pèrsone i atande pa trouvé. Pars i o pa étone anou si i trouve dan lé somenn k’i vien, in bande problème planké d’issi d’laba.

Anfin san abèss pèrsone, ni pé dir avèk Paul Vergès l’avé in moune avèk in léspèryanss san zégal dsi lo travaye dann la réjyon : dopi 1983 ziska 2010 sa i fé prèss trante an a diriz la réjyon, sansa dann lo sèrkle diréksyon. Alor rofèr Paul Vergès, san Paul Vergès mi panss sa kékshoz lé pa fassil pou fé, késhoz la pa sinpe ditou…



Inn modékri, inn ti lavi, inn komantèr ?

signaler contenu


Facebook Twitter Linkedin Google plus