Mésyé, Médam, La sosyété koz èk moin sé koz èk in kouyon-mé sé o pyé d’lo mir k’i oi lo mason. Lo Athanase i anparl dann kozman-la téi apèl Athanase Touchard, in boug téi sort koté Paris épi la komans par vnir Madégaskar-Fort Dofin - épizapré li la vni Bourbon, in l’androi li l’ariv dann lé zané 1670-1671. Pou lo kozman popilèr Fèr konm konpèr Athanase sé dir toultan oui, sé touzour ète dakor avèk lo moun – li té I fé parti lo diréktoir la komine Sin-Pol. Antoine Boucher l’avé in bon léstime pou li pars li lété in l’ansien priyeur son paroiss dan La frans épi li téi koné lir épi ékrir. Touzour solon Boucher (Antoine Desforges Boucher) mé fitintan lo boug téi pans pa lo bien par raport bann zansien Madgaskar épi lo bann zanfan l’avé pa tro suiv lo shomin la vèrtu konmzot papa. Alor, fé azot zot mèm in rézon, pans si zot i vé bononm-la lété konm i di kapab di koshon vol si toulmoun téi di konmsa, sansa i pé done ali – si zot i vé-lo tit parangon d’vèrtu konm i di dann péi déor. Pou mon par mi lèss azot pans sak zot i vé ni é ni rotrouv pli d’van. Sipétadyé !