Fèr kroir la di liziène sa pa son métié. Kan manzé la fine pass dann son bann mashine na pi in mikrob, in viris, in baktéri. Kroir la bat la min. Solman i prétan la trouv in souri bouyi dann boit grin, in toil moizi dann zi dfrui, in dan dann sosis, in losh dann boit poiron.

Kroir la komans douté. Fèr kroir la di armèn lizine tou sa bann marsandiz la fé lo minm zour, Ii ranbours. Li la di, Ii la fé. Kroir la bat la min. Li la mazine té i sar tri do ri grin par grin, zariko grin pou grin, la viann sosis tibout par tibout, zi d’frui gout par gout konm son défin gro momon i di té i fé. La transparans mé zamï ! Fèr kroir la di : Risk zéro kalbass pou bann konsomatèr.

Kroir, la min téi fé mal, a fors aplodi. Tansion viris, tansion mikrob, tansion baktéri, tansion la salté, koudpié sou la lang zot i sava gagné. Solman, risk zéro, sa la poin. Fèr kroir sa in métié pou vréman.