Nout tout i konpran bien kosa sa i vé dir kan néna in kékshoz l’apré mal tourné é kan in pé par zot kozman, zot zèss, zot atitid i agrav l’afèr plito ké-konm i di-kalm bann zéspri. Kalm léspri ? Pé sfèr tazantan sa i égzis, mé pli souvan dann mon vi moin la vi d’moun mète dofé plito ké tinn. Dopi étan pti mi sava mi vien, mi ékout inn mi ékout l’ot, mi rogard inn mi rogard l’ot é moin la fine fé la romark : lé pli fasil mète dofé ké tinn dofé. Lé pli fasil shof bann léspri ké kalm azot. I fo dir dann nout kiltir i done pa la valèr sak i tinn lo fé ké sak i souf dsi l’fé. Lé konmsa é pa otroman : demoun gro kèr ? Sa néna plin, demoun lo san tortu sa lé mal vu. Toué va oir doboi vyolan ! T’a oir kèl koté brinzèl i sharj ! An plis ké sa néna tout kalité kozman kréol i donni dann in ralé pousé. Mé, konbien i rogrète sak zot la fé sak zot la di dann fé d’laksyon. Alé ! Mi kite azot rofléshi la dsi é ni artrouv pli d’van. Sipétadyé !