Médam zé Méssyé, la sossyété koz èk mwin sé koz èk in kouyon, mé sé o pyé d’lo mir k’i oi lo masson.

Mézami dann shak famiye néna touzour inn lé pli antropronan ké lé z’ot, i fé pliss lo shamélèr, lé pli antropronan ké lé z’ot. Si sé in garsson sé in pti om d’afèr-si sé in fiye sé in pti fam d’afèr. Lo bande paran i koné sa, mé an mèm tan néna in pé pliss santiman pou li. Mèm si i di i yèm toute parèye é i fé pa proféranss. Alé artrouv aou la-dan !

Mi rapèl dann Zistoir Kristian - in liv a lir absoliman-, kristian i vé kite lékol pars son famiye na poin larzan pou ashète zéfé pou fé pass ali son gran sèrtifika é sé la ké son momon i trète ali « pti onm d’afèr ».

Alé ! Mi kite azot rofléshi pou oir si étan jenn zot lété pa pti onm d’afèr sansa pti fanm d’afèr. Inkyète pa, la pa in péshé é sa i anpèsh arpa nou artrouv pl d’van, sipétadyé.