Mésyé, Médam, La Sosyété koz èk moin sé koz èk in kouyon, mé sé o pyé d’lo mir k’i oi lo bon mason. Mé zami mi souvien lo tan l’avé poin lo kourant dann la plipar bann kaz : demoun téi sava rode delo la fontène. Matin, midi é soir demoun téi fé korvé d’lo. An parmi bann moun téi fé korvé d’lo désèrtin l’avé in fèrblan, d’ot in rozoir, d’ot lo brok, damzane sansa d’ot kalité résipyan ankor… kan téi sava la fontène ferblan vide téi fé dézord : banm, badanm, babanm ! Kan téi rotourn fèrblan plin téi fé prèss pa dézord : douk ! Koudouk ! koudouk ! é lo téi vèrs pa par raport in bouké fèye mang téi anpèsh dolo klabousé épi désote lo bor. Astèr sa i tonm sans prop mé lo sans pli zénéral – figiré si zot i vé - sa téi vé dir demoun l’avé poin arien pou dir zot mèm téi koz plis, é pou di ninport de koi : i apèl sa koz la boush rouvèr, é bann morisien i di « koz pou pa a la boush pi. ». Alé ! mi kite azot rofléshi la dsi é ni rotrouv pli d’van. Sipétadyé.