Pandan in bon koup de tan nou la domann in zour férié pou lo 20 désanm. Akoz sa in gran zour pou listoir lo pèp La rénion : zour-la, 20/12/1848, soisant-dé-mil pèrsonn* la sort zésklav, la vni "lib"**. Kan mi di nou, i fo pa mazin toul’moun té dakor : gatèr lavé an gaspiy. Koman koman la fini par désid zour-la, in zour férié, la mark sa dann kod travay. Bann gatèr, zot mem, la di zot lé kontan. Moin la pa konü in sèl gatèr la parti défons la port son lantropriz pou travay zour-la.

Té bon, toulmoun la di : lé bon pou sa mem. Demoun la fé la fèt. Té in zour pou fé la fèt ! Solman, in pé la komans ral déyèr. Bann komèrsan la komans dir zot i pèrd larzan.Sak i vann manzé la di : In domi-zourné rouvèr la p’asé. Sak i vann pa manzé la di nou lé blizé pèrd in zourné larzan. Sèt ané, lo préfé la désid lès tout bann komèrs rouvèr, tout la zourné. Lé vré, li lé pa oblizé konprann nout listoir.
In zour va vanzé pou sa ! Kroi amoin. An atandan, kom di lo patoi, kabri i manz salad***. Ala éstèr, La Rénion, zour férié i vé dir, i travay dann komèrs. Mi sar rash la paz mon diksionèr : sa in fo sa !

Justin

*En 1848, on comptait sur une population de 112.500 habitants, 50.000 libres et 62.500 esclaves.

***lo mové kou la fine fé kont nout pasé, nout listoir, nout bann zansèt la soufèr.