Mézami kossa zot i diré si in zour zot lé invité la kaze in moune é ké zot i trouv la porte dovan fèrmé é ké zot i préssan ké néna in lazitassyon koté la porte déyèr avèk in vativien demoune.

Kan zot la fine vérifyé lo zour linvitassion é ké zot la pa tronpé, oila mon késtyon : zot i kriye poin pèrsone - poin pèrsone ziska kass zot gozyé sansa zot i shape loumaye ? Ala mézami in sizé d’roflékssyon. Si la porte dovan lé fèrmé sé ké ou lé pa lo bienvenu. Si la porte déyèr lé rouvèr sé ki vé dir aou : shape. Mi koné in pé sisséptib i kol shomin épi i sava. Mi koné d’ote « afamé » va di : « La i sava fé kui manzé la ? »

Mé par l’fète kèl diféranss rante la porte dovan épi la porte déyèr : la porte dovan sé pou lakèye é la porte déyèr sé pou alé kan ou la fine abityé in pé la zourné. Ké ou lé in pé familyé. Anfin sé konmsa k’ mi oi.

Alé ! Mi kite azot rofléshi la dsi é ni artrouv pli d’van. Sipétadyé.