Elie i konstate issi La Rényon na konm in santiman d’fyèrté shé la majorité bann rényoné : fyèrté d’ète rényoné épi fyèrté d’nout konsyanss rényonèz. An finn kont la fyèrté d’fèr parti d’in pèp rényoné malgré la préssion bann gouvèrnman franssé épi d’ote pou kontèst anou la kalité d’pèp. Pars si ni rogarde bien dopi 1959-la date promyé kongré nout parti kominiss — néna konm in lite améné toulézour par nout pèp rényoné kont sak téi rofiz anou la kalité d’pèp.

Biensir lo révèy la pa fé an in zour é bann militan, mi panss lé pou bokou dann nout long marsh anou… D’in n’ot koté bann zoriantassion la dirékssion nout parti la doné ofiramézir sa la du konté galman é kan i parl La dirékssion i parl bann moune konm Paul, Bruny, Elie é d’ote ankor. Astèr néna galman dann in pèp bann lam de fon é sa i déklansh souvan pou ariv in rézilta i gingn pa prévoir d’avanss mèm an kontradikssion avèk bann diskour ofissyèl.

Mwin la touzour di la priz konsyanss bann rényoné sa i mérite bonpé zétid… Kan mi di sa, mi panss la lang kréol koman èl la sirprann anou. Kan bann zoinal-sof témoignages — téi di lo kréol té atèr, lété plito l’èr li té apré komanss son romonté é néna dé paz é dé paz pou ékrir la dsi konm la dékouvèrte néna in pèp rényoné la fine pran konssyans li lé pèp é li lé fyèr konm Elie la di dann park Laurent vergès.

A bon antandèr salu !

Justin