Lo zimaz lé bien trouvé, parse in landmin syklone, sé vréman sa. Lo péïzaz lé diféran d’la veille, toute lé kassé, piédbwa, la kaz, fèille tôle lé lote koté laba. Ousak lété prop lé en bou, si ou té y wa pa la mer, tou din kou wi wa toute, wi wa mêm la dan la kaz out voizin ! Lo péï lé fatigué, le péïzaze défiguiré, et la bosoin in bon pé Lo soin pou armète tou sa en norde.

Sé sak nou la vi vendrodi matin, nou té y réaliz pa bien ankor, mé astèr ti pé, ti pé, ek laktialité, ek rézo sosial osi, nou wa kel poin syklone Garance là té inn garce ! Na bonpé kréol lé sinistré, na pi la kaz, la perde zot zanimo, zot loto et Bonpé zafèr. Dote lé ankor dann fénoir, ou bien na poin dolo, parfoi même na ni inn ni lote. Lo pir na 4 personne la perde la vie. Sa lé vréman triste.

Lé pa normal, ek toute la teknolozi, la kominikassion kon koméla, na ankor domoun y mort dann syklone ! Dann programm lékol y doit awar dé trwa zèr lé konsakré pou parle danzé syklone, pou esplik kossa y fo fé an ka si y arrive. Y fo marmaye lé sensibilizé ek sa, y fo amont à zot film, épi dokimantère ladsi.

Lé tan pou adapt nout program lékol ek nout kalandrié en fonksion la réalité nout péï.

A bon entendèr sali.