Na konm in nafèr la shanjé dopi zourdlan : nana in nouvo loi i défann fimé dann bann ti-kafé akoz gouvèrnman lé trakassé pou la santé bann fransé. Zot va domann amoin, akoz sa i konsèrn amoin vik mi ral pi in sigarète dopi in bon koup de tan. La pa pou in késtionn santé ! Mon gouvèrnman (mon madam) la pa la èk sa. Mé plito in késtionn’pri : oté ! baya ! lo pri sigarète la monte an flèsh toudinkou. Alors, mon madam lavé pi asé larzan pou fé komision. Bin la di amoin, karéman : « La mori i pass avan ! »

Mi arvien déssi Gouvèrnman trakassé pou la santé piblik. Dizon, mé si ni komans konmsa ousa nou v’alé ?
Tro d’sik épi ou gingn la diabète. Tro la grèss ou gingn mal dann kèr. Tro d’vin i pouri out foie. Tro lo ronm i pouri out tète. Tro d’ri, tro la viann, manzé sossé la pa bon non pli. Tro travay, i fatig ! La boush lé bète, mé mi poz amoin in sinp késtion : dizon wi fé tout lé shoz konm k’i fo, pa pliss... Alors, wi mor pa ? Wi trap sant’an rienk an dimansh ?

É ou ! Sré t’i pa k’ou voudré ruine la sékirité sosial ?

Justin