So matin, kan moin la lévé moin la aprann lo minis lékolozi la démisyone dan la nuite é d’apré sak i di bann zoinalis té i atann dopi si tèlman lontan li téi démisyone, ké kan li la démisyoné, sa la étone in bonpé. Dizon banna téi pans li téi doi kontinyé manz son vomi ankor kék tan. Akoz pa ziska la fin lo manda mésyé Macron ?

Romark azot bien, bononm-la, sa i fé in pé d’tan moin la kalkil ali. Li la donn ali in brové sipèryèr dann lékolozi é i paré in bonpé fransé l’avé donn ali diplôme-la. Mé nou, nou rényoné, nou l’avé poin zéskiz par rapor ali. Mi rapèl solman in zour mésyé Hollande sète éspès foutèr d’moun dodan la anvoye ali fé in misyon La Rényon é li la pass dovan la rout an mèr.

Mi pans li té kant mèm bien plasé pou aprésyé shantyé-la dsi lo poinn vizé pou protèz la natir. Li dové konète bann vré lékolozis l’avé donn in l’avi négatif isi mèm La Rényon é déor laba dann La frans mé li la pa di arien. Li la mèm pa fé antann son voi dann in kékshoz sèryé pou nou é sèryé pou l’imanité. Di pa moin li téi koné pa lo késtyonn réshofman klimatik i ménas anou. Di pa moin li té i koné pa in pé partou lété dékonséyé kontrui bann z’ouvraz dan la mèr. Di pa moin, non pli, li té i koné pa nout l’anvironeman lé frazil.

Pétète final de kont li té pa la avèk nou. Pétète li téi sousyé plis sak i éspass laba dann l’erop. A moins ké li lété in éspésyalis pou aval koulèv é si lé konmsa, étone pa nou mésyé Macron l’avé trouv dan li in léspésyalis dann domène-la. Sansa ankor pli pir li té konm in sinz pri dann in rozoir.