Dopi yère, dann radio, demoune i arète pa kozé dsi kékshoze néna in ministr la propozé mé konm d’abitide, in foi anpliss sé in kozman la boush rouvère pars pèrsone néna dovan li in projé bien détayé avèk sak i gingn fé zordi, sak ni gingn pa fère, épi sak i fodré ni gingn fé dann nout domin.

Mi koné shak foi moindroman i ariv in poussé d’krize demoune i voudré fère sosi ou bien sola san konète si léstatu nou néna zordi i pé pèrmète anou fé sossi osinonsa sola. Néna in pé i di avèk noute éstatu d’réjyon ni pé fère a popré sak i fodré ni fé pou avanssé.. Donk pou zot la pa bézoin d’in shanjman léstatu.

In pé i di, final de konte, sé la politik ké lé pa bon é in mové politike i pé pa produi in bon rézilta… Néna galman sak i di dopi la loi départman franssé é mèm dopi la koloni, La franss la foute anou dann in gob é nou lé bien anbarassé pou nou dévlopé avèk toute lo bande konsékanss shomaz, mizère, é ote ki pérmé pa nou d’an avoir lo rézilta ké ni voudré.anfin la mète anou dann gob néokolonyalism si zot i vé.

Néna dé foi même si noute éstatu i pé pèrmète anou d’avanss in pé, gouvèrnman i ral déyèr é mèm li ankouraz bande réaksyonèr sir plass pou poze anou kalpyé… In légzanpe la politik Paul Vergès éstopé an plin vol si tèlman ni kour touzour déyèr lo train, lotonomi dann manzé, la défanss noute biodivèrsité, lotonomi énèrzétik, épi lo léradikassion la mizère... é toute sak demoune modèrn lé an droi éspéré...

Si tèlman kan Maurice Gironcel la kozé, li la di, sak i fo anou, sé konsèrté épi mète dakor pou in solission par bande rényoné é pou bande rényoné avèk si ni rogarde bien in bon politik pou améné… Pars lé vré flakon i konte in pé, mé sak lé d’dan i konte pou bokou é sa sé la rézon k ‘i konsèye anou konmsa. Nou la tro sibi bande mové politik.