Oté

« Flate tro lo shat, i tard pa li pran ali pou in lion »

In kozman pou la rout

Justin / 23 octob 2018

JPEG - 43.6 ko

Sa sé in n’afèr bien vré : in moun tro kritiké lé posib li rabès ali, in moun tro flaté i oi li dsi la otèr. Provèrb moin la nonm anlèrla i doi z’ète in provèrb l’afrik, mé isi shé nou i di pa : « Atèl in bourik avèk in kaross li pran ali pou in shoval ». In kozman konmsa sanm pou moin lé bon pou tras portré inn-dé, mèm plizyèr pèrsone isi shé nou. Dann tan, konbienn moun kouyon nou la fé roi ? Dann tan ? Non va, koméla lé konmsa ankor. Isi ? Pa solman pars déor osi l’ariv épi i ariv é v’ariv ankor zafèr konmsa. Alé ! Mi kite azot rofléshi la dsi é ni artrouv pli d’van. Sipétadyé !