Médame, zé méssyé, la sossyété, koze avèk moin sé koze avèk in kouyon, mé sé o pyé d’lo mir k’i oi lo masson.

Mézami, kozman mwin la marke an-o la, mwin lé sir zot la fini antande sa, soi zot mèm la di soi zot moityé la di azot. Antouléka, mi panss mwin la fine antande sa pli souvan ké mon tour.

Pou kossa sa d’apré zot ?

Pars la zalouzi sa in kontvalèr lé bien répandu dann la sossyété. Wi vé, wi vé pa mé lé konmsa.

Romark néna défoi lé vré mé la pa toultan kant mèm. Zot la pa romark kan in moune i vie noir aou li trouv touzour kékshoz zoli dann out kour, mékan ou lé toussèl avèk oute goouvèrnman, li fé romark aou la tèr lé sèk, tèl plantaze lé faye, tèl i donn pa frui, tè i done pa rassine, la tèr lé pété konm in dossou d’pyé. San savoir, ou lé an konkiranss, avèk demoune. Bin alor kossa wi fé ?

Wi pran sa konm in fatalité sinploman. Si ou lé pa kontan, wi pran konstan.

Alé ! mi kite azot rofléshi la dsi é ni artrouv pli d’van. Sipétadyé.