Dann tan lontan, kan nou lété pti-marmay, nou téi joué avèk in pyès dë fran CFA in jë té i apèl "Flèr-tèt" konm dan la frans banna i joué "à pile ou face". Pou in jouèr, lavé in bon koté épï in mové koté : in koté lï gingn, in koté lï anpèrd.

Sa i fé panss amoin, mi sort lir dann journal, Madagascar i marsh a fon pou fabrik bio-éthanol. I tard pa zot va produi in gran kantité tonn së zafèr-la.
Alor lë bon koté, sé ranplass in l’énèrji fossil par in l’énèrji i rënouvèl. Sa in bon zafèr, vik pétrol i sava manké épï lë pri i sa rogoumant ankor.

Alor lë mové koté, sé k’i sava vann së l’énèji-la bann kapitalis dann péi konm l’Inn, lë Brézil d’ot ankor. Alor, nï arkomans konm avan. Sré t’i pa in nouvo métod pou kontinié lésploitassion néo-kolonialis. I fo pa oubli lë tan bann malgash té i vann dë ri mé lavé poin n’ri an süfizans pou nouri son popilassion.

Avan fé in n’afèr, mi panss i fo tourn alï dann tout sanss, majine pa solman larjan in pti tépé dmoun i gingn toutsuit, mé oir in pé pli loin k’son bout né.

Justin