La drwat péi la gingn in zo èk lo gouvernman. Komansa in zo, zot la gingn in bwa ? In rèstrankil ? Nonva, in zo po sisé, pou fé bat la lang, kan i sazi sis lo zot, banna i nyinbou byin, i pé kont si zot, é la sanm pou mwin i sar sis sa ziska la mwal, ziska tanto. Zot i koné kosa i lé lo zot ? I an parl si tan télman zordi : kontinié la kontinité èk la frans. Boudikont kontinié pèy bann voyaz pou bat karé. In pé i sar war z’anfan, in pé i fé krwasièr, i sar la nèz tousala. I rod pa si nana pou mitiel, pou lo gaz, pou kouran, na war apré, i donn, i pran, i sava. Mi rakont sa in dalon déor. Ziska zordi li krwa pa.I pèy ton vwayaz pou alé pran vakans dann péi déor ? La rézion i pèy ? I pèy pou tout domoun ? Sak i vé ? Mi an rovyin pa, larzan nana an gaspi alorss. Voui mé nout larzan.

Kisa la donn lo zo banna pou sisé ? Sinonsa bann sosialis. Aforss fé lo mèm politik, kamarad i di, la drwat, sosialis mèm dogré, i rosanm konm dé gout dolo, konm dé frèr zimo ? Bann la ot i di « papié-kolé ». Na pwin ryin pou tiré. Kisa la antrotyin la drwat dopi 2010 ? Zot navé lo shwa rant sak té i propoz bann gran, gran prozé èk sak té i rogard pa pli lwin ké zot bout do né, zot lavé lo shwa rant sa i mazinn lwin dovan pou prépar nout domin é sak i ral a nou atèr, anba.A zot lotèr la manièr i fé, a zot la fé grosi la drwat, la mèt fimié pou fé pousé, la mèt langré pou dévlopé é tou lé zour i aroz. Isi, laba, déor, partou. Kisa la fé lo ni pou la drwat, é dikou zot la fé konm koukou la rant dirèk dodan an 2010, sinonsa sosialis ? Zot la zoué èk do fé, zordi do fé i bril la zèl. Zot la rodé é bin zordi zot la trouvé, an sort a zot éstèr.

Zordi tout la drwat lé romonté, lé dovan Barashwa an gèp. Swa dizan ryink pou la kontinité. Lo vié té i di a mwin « kan ti wa in pié zouminn tèr la, lo pié lé la, mé lo grin zouminn lé lwin »Alorss kont pa si mwin pou galiz a mwin èk zot zordi, pou trinn mon kor èk zot, pa parské mwin lé kont la kontinité, o kontrèr a mwin osi mi vé ranforss la kontinité zistoman, la kontinité èk la frans byin sir, èk péi déor parl pi, mé si lavé in kontinité èk la shinn, èk lo mozanbik, èk madégascar èk lind, péi la donn a nou lo grin, la smans, ni pran, boudikont ni vé fé osi la kontinité èk nout listwar.