Mé zami, si zot i lir zoinal koméla, na dé foi, sa lé sir, mi domann si talèr désèrtin i bate pa la tète kont lo mir. Sirtou pou la késtyonn la guèr épi la pé. Na inn-dé zour moin la antann désèrtin moun la b atiz azot zoinalis apré di dé shoz i bate lintélizans atèr.

Kosa zot i di ? Zot i di l’Iran i vé déklar la guèr bann zamérikin épi ansèrv son zarm détriksyon masiv kisoi son zarm shimik, kisoi son zarm baktèryolozik, pa son bonb nikléèr pars sète-la li la poin. Sa i di dann bann télé loksidan... Aprésa zot i di l’amérik i yèmré bien l’Iran i atak son zintéré avèk bann zarm déstrijsyon masiv konmsa zot va kraz lo péi épi an ripostan avèk zot prop zarm déstriksyon masiv é sar la fin di mond pou li.

Pou mon par mi pans so bann zoinalis néna poin lo plon dan la tète é zot i s’anfou mèm si i ariv a détrui désèrtin péi, mèm lo total kapital… Moin la mèm lir so matin in lartik téi di koméla demoun na pi pèr bann zarm nikléèr é mè zot i souète in guèr avèk bann zarm déstriksyon masiv i ariv konmsa va pèrmète l’amérik avèk son bann ti valal i antour ali détrui tout bann gran Satan konm l’Iran, La koré di Nor é d’ot é d’ot ankor.

Astèr si inn i anparl lékilib dann la térèr konm téi an parl avan, in pé i di la térèr sa i égzis pi. Dizon zot lé péyé pou di sa ! Dizon l’Amérik la grèss zot pate ! Sansa zot manomète lé fosé dopi A ziska Z. An touléka, i pé dir zot i zoué in sal rol zot la épi sa lé sir in pé i doi suiv azot.