An sizé d’somaz Larényon, plis pou bann zèn lé vré, sé tout in lanbordir pou trouv in travay zordi, pou sak la zamé travay, sak néna diplonm, sak na pwin, koman rant anndan pou gingn kansréti fé war zot gabié si zamé. Sanm pou mwin a nou i bat lo rokor anndan la. Télman la sityasyon somaz i amay, néna byinto in nan lo promié minis èk lo miniss de loutromèr lé v’ni ziska sin-jo pou sign in shart èk bann shèf lantropriz pou rokrit lokal.

Zot i an souvyin navé nèf lantropriz, mi donn pa lo nom, lavé lantropriz batiman, lavé sak i vann manzé, lavé sak i vann loto, lavé sak i vann biyé lavyon, sak i vann linèt, navé roprézantan lotèl, sak i vann mèb tousala. Tousala d’moun boudikont té v’ni pou sign in shart pou lanplwa Larényon, pou rokrit lokal vik boudikont zordi tout lé apopré dakor pou rokonèt ké an késtyon travay, nout zénèss lé dann malizé.

Alorss zordi talèr in an déza, ousa i lé. Pétèt sé lo moman argard in pé si tousala la fé son léfé. Bann lantropriz la sign la shart i pé donn a nou inn ti lékléraz la d’si, é sak la pa sign la shart pétèt zot la kantminm pran modèl tèlké lédikasyon nasyional, ala in landrwa i gingn konsom lokal, la poliss ? La osi i di i gingn fé v’ni bann lokal. Mwin la oubli di a zot, polanplwa osi té la. Fo pa i rèt aryink o mo, fo pass a lak !