Kan moin lété pti, moin té i lir in zournal pou la zénès téi apèl « Vaillant ». Sa té in vayan zournal é mi doi dir dopi tan-la moin la pankor trouv in zournal « kaptivan konmsa ». Pars son réklam lété : Vayan zournal lo pli kaptivan... Dann Vayan l’avé listoir Arthur lo fantome zistisyé téi défann lo fèb kont lo for. Mé in poinn détaye, kant mèm : tout bann fantome té i gingn travèrs in mir é Arthur téi gingn pa, é mèm si so famiy l’avé donna li lo formil k’i fo, li téi gingn pa bien tiliz sa. Donk, ala in fantome, li gingn pa fé sak in fantom normal i fé donk li lé konm nou zordi : ni fons dann mir, mé nou lé sinploman riskab kraz nout figir. Alé ! Mi lèss azot rofléshi la dsi é ni artrouv pli d’vansipétadyé.