Bann moun sinp, bann moun rodinèr, i pans pou d’moun viv in pé myé, i fo goumant larzan travay, la rotrèt, larzan zanfan, plis bann minima sosio.
Zot i pans osi, si bann marshandiz i diminyé in pé lo pri, sar méyèr pou z’ot port-moné.

Mé bann gran vaza i diriz lo péi i pans pa konmsa ! Zot i réponn : si ou i vé gingn plis, i fo ou i travay plis ! Si ou i vé marshandiz i diminyé, i fo nana la konkirans rant bann magazin é, pou sa, fé konfyans bann komèrsan, vi k’bann pri lé lib.

Sak zot té i di-la, la si tèlman byin marshé, z’ot zyé lété si tèlman byin rouvèr, é zot l’idé lété si tan tèlman bon, k’bann moun sinp, bann moun rodinèr la romark, zour-an-zour, zot pla la diminyé, épi la fin n’moi l’ariv pli-z’an-pli bonèr.
Momandoné, bann vaza la dékouv in n’afèr : zot la di sé la fote "la kriz", pou dir konmsa la pa z’ot l’otèr.

É alor, zot la di, zot i pans sé larzan lo moi k’i fo goumanté, é bann pri k’i fo bésé.
For ! for ! tro for ! Dizon, zot in bann linvantèr lo tyède !

Justin