Méssyé, Médam, la sosyété, koze èk mwin sé koze èk in kouyon mé sé o pyé d’lo mir k’i oi lo masson. Kozman-la mwin lé fine lir ali dann bann proverb afrikin, mé galman dann bann proverb indien é mi domann amwin si sa lé vré vréman. Mi rapèl, dann in vilaz indien in sosyété té apré install in pti santral éléktrik solèr é l’avé in madam lété apré aprann koman I fé. Aprésa, kan èl té fine aprann, plizyèr madam l’arivé avèk shakinnn in pti kado lo gouvèrnman lo l’androi, shakinn in pti santral solère é zot l’assiz é lo promyé madam la komanss amontr lé zot. Mi rapèl èl lété ankor pliss atansyoné ké kan èl lété apré aprann èl mèm… La pa ké dann vilaz-la bann bononm lé pli maladroi, mé pou gingn nouri lo famiy souvan dé foi zot I sava travaye loin. Alor si néna in pane zot i oi l’annuiman… Astèr mon poin d’intérogasyon sé pou La Rényon : mwin la bien père si in ka i prézante konmsa, sé l’om i aprann avan é pétète sé li tousèl k’i aprann. Nout sosyété sré pa tro oksidantalizé ? Sansa l’om rényoné sré pa in pé tro macho ? Mi kite azot form zot lopinion par zot mèm é ni va artrouv pli d’van. Sipétadyé.

NB in pti zistoir kant mèm : Mwin néna pèrmi pou kondui loto, é mon madam néna pèrmi èl ossi. Kan èl i sava tousèl èl i amenn loto, kan mi sava tousèl sé mwin k’i amenn, mé kan ni par noute dé ansanm. Mi lèss azot doviné kissa i kondui. Baz dsi zot mèm, é zot va trouvéla réponss.