« Fors in moune fé sak li vé pa sé konm sèye ranpli la mèr kou d’galé »

Médame zé Méssyé, la sosyété koze èk mwin sé koze èk in kouyon mé sé o pyé d’lo mir k’i oi lo vré masson.

Mézami konm zot konpran ni kontinyé noute batkaré dann bande provèrb Haïtien. Konm zot i rande azot konte kozman konmsa néna in pe dann toute péi an parmi tout pèp épi toute sivilizassion. Pars dizon sé in vérité inivèrsèl ké demoune i fé bien arienk kékshoz li lé dakor pou fèr bien. Sa i rapèl amwin lo kozman souvan dé foi i ansèrv dann la pédagoji : « Komab wi sar sèye fé boire in bèf si li la pa soif » é kan mi di sa bande souvnir mon zénèss i romonte a la sirfass. Mwin la sirman fine anparl azot sa, mé in foi an pliss sar pa in foi an tro : Mon papa l’avé in bèf é sépa pou kossa in zour bèf-la la déside pi boire é manzé. L’aroz son zèrb avèk lo d’sèl, na poin arien pou fé. Done ali lo pli méyèr tourto, zéro rézilta. Lo zèrb lo pli tande, li manz pa mèm. Si tèlman mon papa la flanke in kou d’poin marto dann kote lo bèf déza in pé afayi é li la tonb atèr. Rien a fère pou fé lèv ali, lété blijé apèl boushé pou tyé lo pov zanimo.

Alé ! mi kite azot rofléshi la dsi é ni artrouv pli d’van. Sipétadyé.

Provèrb haïtien : Fose moun fè sa yo pa vle fè se tankou esye plen lanmè ak wosh