Méssyé, Médame, la sosyété koze èk mwin sé koze èk in kouyon, mé sé o pyé d’lo mir k’i oi lo masson . Mézami, kozman mwinla mark an-o la , mwin lé sir é sèrtin zot i koné pars étan pti noute famiy souvan dé foi la di anou. Pou koué té i di anou sa ? Sinploman pars a s’ki paré nou kréol nou lé kiryé, ni vé konète, é mèm sak lé insignifyan i intérèss anou. Dizon nou lé konm linspèktèr Kolonbo, ni vé savoir. Ni rode, ni rode ziska trouv in n’afèr mé antansyon sé kékshoz k’i pé fèr anou d’tor. Souvan dé foi, mi di, shèrch a konète, sé rode zannui pou son kor é kalkil bien sé sak i ariv tazantan... Mon papa, in om kiryé, téi di : « Pli kiryé ké l’om sé la fanm ! ». Mwin, pou mon par, mi koné pa pars si mwin la fine trouv bann fanm kiryé, mwin la trouv bann bononm konmsa ossi.. I di ossi : « Kiryé i marsh par dë ! ». Zot i konpran sé l’om épi la fanm. Alé ! Mi arèss tèrr-la pars m’a gingn kozman, mé lé pa défandu rofléshi la dsu é ni rotrouv pli d’van. Sipétadyé.