Médame zé méssyé,la sossyété , koz èk mwin sé koz èk in kouyon mé sé o pyé d’lo mir k’i oi lo masson.

Mézami, mi kash pa dir azot, dopi dé zané mi viv dann bande provèrb épi dann bande zéspréssyon dann noute kréol rényoné. Déssèrtin i plé amwin bonpé, d’ote i fé sourir amwin.d’ote ankor i poz amwin pliss éstyon ké réponss. Dann lo dèrnyé ka néna kozman mwin la mark zordi. Final de konte mwin lé a d’mandé kossa li vé dir, fransh vérité.

Mi sorte lir sa dann somi-lo-mo in liv noute dalon Daniel Honoré . li arzoute kék mo lésplikassyon pou dir : « in fasson pou réponde wi kass a la tète dovan in kassaz lo kui ». Lé ga, mi vé bien ! mwin-mèm mi pouré réponde sa kélk’in l’apré annuir amwin. Mé final dekonte mi trouv pa in lésplikassyon bien korèk pou mwin .

Mi yèmré dir in moune par ébzanp : oute kozman é mwin sé konm lo dsi fèye sonz... Ankor in mistère pou mwin é pou zot ? Zot i vé bien rofléshi la dsi ?

Ni artrouv pli d’van sipétadyé.