Mézami zot i koné kossa i lé in foutan : sa sé in kozman sou la form in mové plézantri, in kritik makiyé an plézantri mové gou. I di ossi i fo pa pran foutan pou konpliman pars lèr wi panss lo moune l’apré konplimante aou, lé apré krétik aou — in malparlaz konm i di koméla dann télé — promyèr.

Par l’fète kréol i yème pa kan i koz avèk li an foutan é sa lé normal. Zot i koné kréol lé sissèptib é avèk li i fo pa di ninporte kossa pars vitman-vitman li pran sa pou in komansman d’bataye. Taka kozman mwin la marke an-o la, ni pé di sa sé in réplike pou amontr lo foutan i fé pou dsi ou konm lo dsi fèye sonz — final de konte i ansèrv pa arien, mèm in koshon liangrèss pa.

Alé ! Mi kite azot rofléshi la dsi é ni rotrouv pli d’van, sipétadyé.

Justin