Mézami, oila in kozman mi koné dopi lontan mé mwin téi panss pi ziska ké mi lir ali dsi la foto dann nout zoinal — sa la pass samdi. Poitan mi koné sa lé inportan pa si tèlman pou lo foutbal, mé pou la vi an sossyété.

Li vé dir — d’apré mwin — i fo pa konfonde lo laktèr avèk lo léspéktatèr. Ni pouré di galman i fo pa konfonde lo zaktèr, avèk lo kronikèr é lo spéktak avèk lo spéktatèr. Pou koué ? Pars la pa lo kronikèr k’i fé laktyalité, li rakonte solman sak la éspassé. La pa lo spéktatèr k’i fé lo spéktak : li rogarde, li apréssyé, mé la pa li k’i fé.

Mi panss sa i mérite in roflékssion é sé pou sa mi lèss azot fé travaye zot koko la dsi é ni artrouv pli d’van, sipétadyé.

Justin