Oté

Francis Sautron, in vi égzanplèr dann la solidarité

Justin / 15 févrié 2019

JPEG - 43.6 ko

Mèrkrédi soir moin la gingn la shans partisip in konférans l’inivèrsité La Rényon. Mi di shans pars bann konféransyé la déroul dovan nou plizyèr paz listoir La Rényon alyansé avèk plizyèr paz listoir Madégaskar. Avèk in éro prinsipal Francis Sautron, in moun la viv – konm i di in vi ki pé sèrv konm légzanp pou bann kréol rényoné k’i lèv zordi.

Biensir nout zournal Témoignages la anparl yèr é mi sava pa fé lo patéfone an répétan sak li la fine dir mé mi pé dir azot, souvan dé foi, le moun té la lété bien émosyoné par la vi nout bann frèr malgash dann lé zané apré la dézyèm guèr mondyal. Si mi di azot désèrtin jenn rényoné, dann tan in kolonizasyon dir vèye pa koman, la nyabou fèr la prèv zot l’avé in vré l’amityé pou lo pèp malgash é zot la aport la prèv zot lété kapab mète mèm zot vi dann danzé par solidarité avèk nout bann frèr malgash, mi pans pa moin la déote la vérité.

L’ané pasé, moin la gingn lokazyon fé in modékri dsi Louis Leichnig, militèr angagé dann l’armé kolon yal fransèz épi li la nyabou sov otann malgash li la pu sové dann bann masak lo l’armé kolonyal lé fé dann Madégaskar... Mèrkrodi soir banna la anparl in sindikalis té i apèl Francis Sautron-zordi désédé, in militan égzanplèr dann la politik épi lo sindikalism isi La Rényon, mé galman égzanplèr dann sak li la fé Madégaskar an solidarité avèk bann travayèr malgash dann in sityasion kolonyal bann konféransyé la ésplik anou konm in bann z’ané d’plon.

Louis Leichnig, Fransis Sautron é tan é tan bann kréol La Rényon la luté kont l’injustis kolonyal. Zot la fé listoir isi shé nou, zot la fé listoir laba dann Madégaskar avèk la solidarité konm drapo. I f opa ni pass zot nom dann silans pars bann jenn jénérasyon i pardone ar pa nou.