Méssyé Estrosi, minis épi fouchlanguèr* byin koni, la lans so fraz-la. Sa i rante dann a kanpagn pou sifone bann zéléktèr Fron-nasyonal. Konm d’abitide, ga-la i fé pa dann détay. Plis lé gro, plis lé bon. In kanon pou tyé moush, si possib. Solman, son kozman i domann pou fé travay in pé la tète.
Pars nana an parmi bann fransé, sak lé voiyou é sak lé pa. An parmi bann zétranzé, nana sak lé voiyou épi sak lé pa. An parmi bann voiyou, nana sak lé fransé épi sak lé pa. L’èr-la, kissa i sava fé lo triyaz la-dan ? Gouvèrnman ? Mé dann gouvèrnman nana pétète sak lé voiyou épi sak lé pa. Bann jij ? Ankor parèy. Bann politik ? Zot i kroi lé nana ankor in bon diférans. Bann zournalist ? Kissa k’i pans zot lé konm savon-la poud k’i lav pli blan. Nana bann voiyou la fé la frode zéléksyon é zordi zot lé byin alèz, byin konsidéré, byin asiz dann la sosyété... in pé i lav mèm zot pyé.
Arzoute èk sa, voiyou nana toute kalité. Nana voiyou é nana voiyèl. Nana bann kagnar voiyou, mé nana ossi bann voiyou byin édiké, byin poli, byin friké. Nana pti voiyou é nana gran voiyou. Voiyou kol noir é voiyou kol blan. Lakèl i mète déor ?Lakèl i tir son nasyonalité ? Mète ankor la-dsi bann sak i gingn artrouv in bon konduite épi sak va rèss toultan voiyou. Bann voiyou zényal, mizisyin, komédyin, savan épi bann z’abriti. Fransé sansa voiyou ? In drol de shoi bou di kont...

 Justin 

* Boug-la la lang i maye-maye souvan dé foi. Sé li kla di “la retraite des réformes” olèrk “la réforme des retraites” dann in l’émisyon radyo.