I pé pa dir, problèm le pri lésans, sa lé konm in zépine pagote dann pié d’moun. Oté, Baba ! Sak i koné pa sa, tir son soulié, sansa poz in pé son pass-doi atèr, épi mète le pié déssi bann ti liane i donn zoli pti flèr jone, i pous bordaz la mèr. Oté kouzin ! Sa i alime aou sa ! Parl pi si li kass dann out pié, la i fé dans aou-la, la i fé lans aou-la ! Ala pou kossa mi pans, i fo fé travay la tète pou trouv in solission kom k’i fo, in bon solission.
Na poin lontan, moin la antann Pierre Vergès apré propoz in solission pou tash moiyin anpèsh lo pri lésans tro goumanté... fé in oss-bèss san arété... in solission pou k’lésans i kout mèm pri dan la Frans épi issi. Mi oi in pé i pans déza in n’afèr konmsa lé pa possib. Poitan ? I fé déza sa pou léléktrisité : kouran i kout mèm pri an Frans épi issi. Sak i gingn fé pou kouran i gingn pa fé pou lésans ? gazoil ? le gaz ? Bien sir k’i pé, é moin lé sir bann pétrolié v’arète fé lo manekin si l’Éta i drèss in pé avèk zot. Si zot i konpran, i sava avèy azot konm lé déssi l’fé !
Koman i pé fé in n’afèr konmsa ? Dizon gouvèrnman i pé mète larzan dann in kès pérékoision. Avèk so larzan-la, na moiyin konpans la goumantasion bann pri, éstabiliz azot. Sré pa valab in n’afèr konmsa ? Sré pa valab pou bann partikilié é pou bann lantrepriz ? Sré pa valab kont déssi in bidzé ou i pé prévoir an avans... o moins ète sir k’le pri i sar pa trang aou par in koud goumantasion i ariv d’in kou ; mi koné in bon pé d’moun sré kontan avèk in n’afèr konmsa.
Donk, pou moin, sé in bon solission, sé in bon lidé ! Épi in bon lidé, i fo pa zété ! In bon lidé, lé zamé an tro sirtou dann i késtion konmsa. Fransh vérité !

Justin