Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

Fransh vérité matant, mwin lé pa tète dir : mwin lé paré pou kite PCR pou rant dann PKR

mardi 15 désanm 2020, sanm Justin

Matant Zélida la ékrir justin :

Mon shèr nové, mon spèss salté, rouj-do-fon ziska pou l’éternité, éskiz amwin si mi toush landroi i fé mal : mi vé dir mi anparl aou out parti shien pèrdu san kolyé, an kour d’disparisyon. Mon pov nové, oulé toultan paré koz out parti PCR mé wi oi bien si li l’avé in bo tan sér)yté yèr,zordi son botan la fine fané. Alor, tir l’éshèl épi si la politik i intérèss aou, akoz wi sava pa angaj aou dann in n’ot parti.Méyèr fassonn fèr sésa, lo rèst sé tan pèrdu, l’énèrji gaspiyé. Tok ! Pran sa pou toi !

Justin la fé pou réponss :

Mon vyé matant k’i koz toultan la boush rouvèr, i étone pa mwin sak wi di d’nout parti.Matant m’a dira ou fransman mwin lé pa fétishis.Sé pou sa ké mi di aou : si par ébzanp wi trouv in parti konm sak i suiv, mwin lé paré pou adéré :
Inn mi yèmré parti-lasré in parti kominis avèk la filozofi kominist, épi toutt son konsékanss konm la zistis sosyal, l’égalité, lo droi viv pou tout demoun épi i aboli la povrété.

Dé, mi yèmré sé in parti rényoné donk avèk konm poinnvizé prinsipal La Rényon :la Rényon dann kèr si ni pé dir épi in plan pou dévlop nout péi épi in fon pou lo dévlopman.. ; ou lo rèst détaye, mi konsèye aou téléfone la ri Général Roland dann port é laba va donn avou tout zindikasyon.
Donk pou dira ou la vérité mi vé bien kite lo parti pou rant dann in n’ot avèk lo mèm program, lo mèm idéolozi épi lo mèm filozofi, mèm moral é tutti quanti. Tok !Pran sa pou toi !

NB olèrk apèl ali PCR-parti communiste réunionnais- i pé apèl ali :PKR :Parti kominis rényoné é la pa in blag siouplé.



Inn modékri, inn ti lavi, inn komantèr ?

signaler contenu


Facebook Twitter Linkedin Google plus