Koman i fé pou tyé in rinoséros ? I fo tir ali in bal dann zyé ! Solman, konm li na in zyé an boutonyèr, kaziman an nouvèl line, lé dir pou tir ali in bal ou k’i fo. Solisyon : ou i done ali in shou zordi, domin in n’ot, apré domin in n’ot ankor… épi apré ou i done ali in shou Briksèl. Kosa li fé, kosa li di ? "Sa in shou… mon zèy !", épi li kart son zyé èk son pate, li grandi ali. L’èr-la, lé bon pou tir dodan. Sa in zistoir kouyon. Mé pa danzéré. Na zistoir kouyon épi danzéré.

In légzanp, pou fé kour rokin, demoun la invant in mashine é i prétan dir si ou i mète mashine-la an marsh, i déroute lo rokin, i fé pèrd ali l’èr. In gayar z’afèr pou vréman. Soman nana in ik : na in pé i kroi pa sa lé posib. Na in ga la fé in l’ékspéryans èk in kadav poison épi lo l’aparèy. Li rakont, la pa fé pèr lo rokin, mèm rokin la trouv son plézir la-dan. Séryé ! Pars si sak li di lé vré, mi oi pa moin alé bingn dan la mèr, sansa fé surf èk in l’aparèy konmsa. Dizon lé konmsi ou i sava la shas épi ou i kashète dann in touf do boi é ou i émite lo tourtrèl. Etone pa ou si in shasèr i tir in kou d’fizy dann touf de boi, é ou lé mayé pou fé tir lo plon dann out déyèr èk pinsète. Si la pa pli grav !

Kan mi di sa, mi pans in roi d’koulou i apèl Raoult... in droite patanté. L’ané 2009, lo boug la di, vote pa pou Belo é pou Klode, pars kominis sar o pouvoir dan la Koré di Nor ; dann Kiba, épi Sin-Pol avèk Sin-Lui. Si la kouyonis té i tyé son om, boug-la té mor dépi lontan. Pars lo Raoult, li kontinyé dan son vilin manyèr, i sava poz in késtyon gouvèrnman pou dir, solon li, lo mèr Sin-Pol i pran pa son résponsabilité. Li oui ! Pars li koné tout sak i fo fèr pou protèz anou kont rokin. Séryé lo boug ! Alala ankor inn la tyé kouyon pou pran son plas, é i pans li pé trouv in solisyon.

Mésyé Didier, pou son par, la déside fé vnir bann l’aparèy mirak konm sak nou la vi an-o la, épi la Réjyon va péy in ta èk in paké l’arzan. Plito k’fé sak zot i fé, akoz zot i sar pa la shass rinoséros, suivan la téknik moin la di tanto-la ? Fransh vérité, mi propoz azot sa !

Justin