Ko sa ou veu ? In krash lavion, dé krash, partou krash, lindonézi, lukrène, la ouagadougou, i komans fé pèr pran lavion !
Pouatan sé in moyin plito sir voyazé : mé avèk bann zéta an azitasion, po pa dir an gèr, ou pé èt krintif pas si sertin téritwar.
Bokou landroi nana mékontan sistème politik zot péi ; tan ki bouz a tèr, si ou lé loin (konm nou) ou i apersoi pa, a par dé troi biltin dinformasion...

Solon zot, a koz lo prézidan i anil son voyaz la Rénion ? 51 Fransé mor dan lavion !Lankèt va déterminé lé rézon laksidan ; lavion dézintégré ! Dézintégré tou sèl ou sinon li la rosi un léksplozion in prozéktil ; talèr ou vé pa inn lénmi la Frans la vanz si légzagone, a koz sak la Frans fé an Afrik i plé pa li !
Ou kroi si Lukrène, lo misil la pa parti intansionèlman ? I apèl sa akt robélion ! Li vé fé rekul ladvèrsèr. Bann Rus (Poutine) i veu rékupèr lés lo péi po zot ; sirtou li veu pa Zukréniin i rant dan Lérop !

Mi roviin su nou ; parlfèt lanilasion la vizit lo Hollande, nout tout, nou lé an pansé, ék bann mor lavion Air Algérie, la fé son Krash o Mali.
In péi pli grank la Frans, dézèr ; mé ék lavion militèr miraz, lélikoptèr, la fine ropèr lépav ; na pi riin po tiré, a par la boit noir ; nora okin sirvivan.
An minm tan tout pérsone la pèrd in manm zot fami, dan so laksidan lavion, la Rénion, tout la Rénion lé shagrin.

Justin