Médam Zé méssyé, la sosyété, koz èk mwin sé koz èk in kouyon, mé sé o pyé d’lo mir k’i oi lo masson. Zot la pa romarké souvan dé foi bann momon i di zot zanfan néna mové frékantasyon é sa i port pa zot la shanss dan la vi. Pou ma par, mwin lé touzou apré domandé ékèl koté néna lo mové frékantasyon. ki i détourn ki ? ki i antrènn ki ?.. Pars mwin la romark souvan lé difisil fé la par rant lantrénèr épi lantréné. Mé néna ankor in kozman i di : sak i rosanm i mète ansanm-qui se ressemble s’assemble é in kozman pir k’sa i di : koshon i frékant koshon. Sé pou sa lé difisil bien disting sak i apèl l’antrénèr épi l’antréné. An touléka, mi kite azot rofléshi la dsi é ni artrouv pli d’van. Sipétadyé.