Médam zé Mésyé, La sosyété, koz èk moin sé koz èk in kouyon mé o pyé d’lo mir i oi la vré mason. Mézami, moin la fine antann ankor kozman-la : « Dor avèk lo shien, wa lèv avèk lo pis. » Lo dé provèrb, d’apré sak mi romark, lé in pé parèye - mi dira pa topète-morète, mé prèss. Tout fason kozman nou la mark an-o la sé in provèrb é in provèrb i donn demoun in rogar dsi la sosyété : ou i frékant bon moun ou i vien bon moun, ou i frékant mové moun ou i vien mové moun. La plipar d’tan lé konmsa ! Sa lé konm in kouran d’lo kan li antrènn aou. Alé kontrkouran, sa lé kaziman inposib. I di osi pou lédikasyon lo mètr d’ékol sé lo vilaz. Alor, ni konpran bien la frékantasyon d’moun i pé z’ète in bon n’afèr si sé in bon frékantasyon, mé i pé z’ète in mové truk si sé in mové frékantasyon. Alé ! Mi kite azot rofléshi la dsi é ni rotrouv pli d’van. Sipétadyé.