Kan lo prézidan La Frans la pran son tour pou li ète prézidan lo konsèy l’Europ, in zournalist la koz avèk li konmm "prézidan l’Europ". Li mèm la fé pou répons, l’Europe na poin prézidan vik lo trété éropéin la boir bouyon : bann fransé ansanm bann hollandé la vote kontr. An vitès banna la fabrik in léspès trété la-ba Lisbonne épi la di : « So kou issi, i fé pa référandome ! » Alors lo bann dépité la vot lo léspès trété, inn apré l’ot, d’issi d’la-ba ! Soman, bann z’Irlandé laté oblizé, par z’ot konstitision, fé in référandome. La pa manké ! Bann z’Irlandé la vote non !
Akoz zot la vote non ? In pé i di ni konpran pa arien, d’ot i di l’Europe pliské libéral ni vé pa, d’ot ankor la di lékonomi lé vréman dékaniyé, bann zènn la di ni gingn pi travay dann nout péi. In pé la mèm di : « Ni rokoné pi nout shé nou ! »
Alors, lo prézidan pou sis moi k’i komans kroir, plisk’i sava, pou vréman li sé lo prézidan l’Europe ké napoin n’prézidan, lété rousté, an kolèr. Son gaz la monté épi li la di : « bann z’irlandé va arvoté. »
Kossa, banna la di, si nou lé pti nou na gro kèr. Alors, "non sé non" épi ni débouz pa. Sirtou kan sé in french gaffeur k’i vien fé l’amontrèr !

Justin