Mi rapèl mèm in madam rényonèz réstoratriss, zoinalist la intéroz aèl pou konète kossa èl i anpanss lo rovizitaz rougaye sossis.Tèlman èl lété an brin d’zing èl la di : "Alé di lo madam, -donk la rovizitèz- alé rode in kamarade pou èl". Souvan défoi mi antande bande rényoné(èz)apré pète in kab pars in moune deor la gaskone in n’afèr lé fé issi, é d’apré nou lé pli valab ké toute dsi la tèr Bondyé.

Apré lo kou d’pintir, lo roprosh é dsi kossa li porte zordi, mi done zot an mil, li porte ankor in kou dsi la lang kréol rényoné. Pou kossa d’apré zot ?

Sinploman dsi sak mwin la tandi dann zoinal télé. Mwin la antande dir, bande kolézien La Bretagne-an franss- épi bande bask-an franss galman- sak i frékante lékol assossyativ dann zot lang réjyonal la désside sète ané zot dovoir zot i fé dann zot lang réjyonal kan zot va pass brové.

In pé kréol la aprouv l’afèr, d’ote la di lé pa pridan é si zot i gingn pa zot légzamin, zot l’apré rate zot vi, étsétéri-étsétéra- dé kanar pou in poul é mwin lé sir si lété marmaye La Rényon l’avé di sa, lété riskab trète azot robèl, kagnar, malfondé, sipo d’satan é konpagni... Pétète té lo mèm moune apré dispite pars in moune déor la mète safan dann brède mouroung.

Mi konpran lo madam pou lo rougaye sossis, osinonsa lo brède pouroung, mé mi konpran pa li pou la késtyonn lang kréol, lo poto-mitan noute kiltir kréol san ki noute rougaye n’arté pa rougaye, nout séga n’arté pa séga, noute somi lo mo n’arté pa in somi lo mo, nout kiltir n’arté pa noute kiltir. Nou la fé noute rougaye, nou la fé noute mizik, nou la fé noute dovinète, nou la fé noute kiltir, mé nou la fé ossi noute lang kréol rényoné é ni doizète fyèr noute lang kréol rényoné.

A bon antandèr, salu !