Souvan dé foi, mé pa toultan, na demoun i sort dann péi déor i kroi zot i doi fé avèk nou konm si zot sé nout z’amontrèr é nou marmay l’ékol, pou amontr a nou kossa lé bon pou nou, kossa lé pa bon, kossa k’i fo fèr, kossa k’i fo pa fèr… mi pans, se bann moun-la na in sans in pé éspésyal déssi l’inivèrsalité. Sak, solon zot, lé bon pou zot lé bon pou toulmoun, sak lé pa bon pou zot lé pa bon pou toulmoun. Mé solman, si zot l’avé kansréti in pti dégré la modésti, mi pans zot noré tourn an sète foi z’ot lang dann z’ot boush avann kozé... nora été pli myé !
In pti madam i roprézante in l’asosyasyon i nonm Ni pute, ni soumise i sort débark La Rényon na inn-dé zour. Lo zour èl i ariv, èl i di dé mo dann télé : èl i vyin pou tash moiyin ède bann madam i gingn lo kou avèk bann bononm. L’èrla, i fo bate la min pou èl, i fo bate la min pou son kouraz… sirtou ké dépi in bon koup de tan, nana demoun nout parti i vanj pou lo droi bann fanm. Nou na dann nout tète bann nom konm Isnelle Amelin, Laurence Vergès, é tan d’ote nom ankor... Mi souète pti madam i sorte arivé i ède anou pou diminyé la vyolans kont bann fanm, si tèlman sa i fé déga dann nout sosyété, an parmi nout popilasyon.
Bravo ti-madam. Bravo ! Mé kan, toutinkou, oute kozman i bransh déssi la loi la laïsité, éstèr-la, mi bate pi la min ditou. Solon ou, i fo aplik la loi La Rényon konm i aplik partou dann toute départman La Frans. Mi domann amoin solman si ou la pran lo tan pou fèr in tour, koz avèk demoun, intéroz in pé sak nana l’otorité, pou byin konprann lo problèm, si na in problèm... si i aplik la loi an moun intélizan, an moun rézonab, ou byin si i aplik pa konm k’i fo. Mi pans sa in bon manyèr fé avan ou i done anou lésson. Gard-gard in pé byin avan ou i porte in zizman déssi nout manyèr viv la laïsité, issi.

Justin

Lésplikasyon inn-dé pti mo :

In pti dégré : in pti guine, in pti zyèk, in pti grin.
Amontrèr : proféssèr ; amontré : anségné.
Pli myé : pli méyèr, pli byin.
Toutinkou : tou d’in kou, sibitman.
Konm k’i fo : konm lé néssésèr, konm k’i doi.