Mésyé, médam, la sosyété, kroir amoin sé kroir in kouyon-o pyé d’le mir i oi lo mason. Pou sak la pa konète sinéma lontan Garson lété kid Karson, in léspès éro la pakotiye konm l’avé é pétète néna touzour dann bann fime amérikin. Pou mon par mi doi dir moin la touzour préfèr bann zindien par rapor bann yankee. Pou kosa ? Mi pans bann zidé – la moin la gingn sa dann zournal vayan-in zoinal intèrnasyonalis konm néna pi zordi. Dann zoinal-la téi anparl an bien tout bann viktime plito ké mète anlèr bann zésploitèr, bann volèr la tèr lé zot la plipar d’tan rasis konm lé pa posib. Mé moin gras zoinal vayan é gras parti kominis mi pans pa moin la tonm dann pano… Alor kan téi sava sinéma la plipar tan, bann jenn jan té i pran parti pou Garson-kid Karson - épi téi viv ansanm-avèk si tèlman ou té riskab gingn kou d’poin, gingn kou d’tète avèk out voizin. Alé ! Mi lèss azot, si zot la konète, arpans in pé sinéma lontan : sa i ropoz la tète. Ni artrouv pli d’van. Sipétadyé !