Lucien Gasparin té in om politik noir né l’ané 1868 é mor l’ané 1948. Brunet Auguste (si mi tronp pa)-1878-1957 li ossi té in om politik mé blan. D’apré sak demoune la di amwin, inn é l’ote lété dë zadvèrsèr é inn konm l’ote la amenn in gran karyèr konm politissien. Lopinion piblik lété bien divizé si tèlman ké sa téi done diskission san fin.

Si tèlman ké momandoné-néna bien lontan – pou dir patati-patata, téi di konm mwin la mark an-o la : « Gasparin Brunet – Brunet Gasparin. »

D’apré Daniel Honoré - oir dann Somi lo mo – momandoné, l’avé in boisson téi apèl in Gasparin-Brunet : in mélanz lo ronm avèk lo vin kui (konm kina par ébzanp). Téi sèrv sa dsi kontoir dan la boutik mé mwin pèrsonèl mwin la antande plito « Ronm-kina » é zamé lo gasparin-brunet.

Mi arète tèr-la é sak i intérèss la késtyon, i vo myé li sava rogarde dsi l’internet pars bande moune-la la fé listoir La Rénion dann tan la koloni.

Alé ! Mi arète tèrla pou l’instan. Asoir ni antèr silvèst épi l’ané 2021 an mèm tan. Viv zour d’ lan !