La limyèr la vil, sa lé zoli. Sé konm k’i diré la nuite lé konm la zourné. Mé la nuite, sé pa la zourné, alor afèr vouloir la ri lé kléré konmsa, an plis ké sa toultan, dé foi mèm kan na poin pèrsone. Ou i pé oir bann gro far déssi bann éstade vide ! Ou i pé oir in bann ri kléré baba vèy pa koman pou in moun i pass tazantan. Pars demoun dan la ri, la nuite, souvan dé foi, sa lé rar konm korn lapin... Alor, demoun, kan i ariv z’ot kaz, i kroi zot lé blizé rouv la limyèr partou : kan i rant dann in pyès, i klèr la limyèr, kan i sort, i tinn pa. Kan i rante dann sal de bin, i apiy déssi lo kontak, kan i sort, i dézapiy pa ! I prétan dir, in pé i vé la limyèr lé kléré kan zot i dor.
Kossa k’i ansèrv ? Aryin, mé mon kouran, sé moin k’i pèy, alor pou kossa i vyin an-nuir amoin ? Shakinn i okipe so shé-soi !
Mi sorte antann bann komine i dépans moityé z’ot faktir kouran pou lékléraz piblik : sa la pa la grèl in n’afèr konmsa. Mé si mi tronp pa, sak la komine i pèy, i tir in pé déssi mon z’inpo, alor si i tinn in pé la limyèr la nuite, pé s’fèr i diminyé in pé mon z’inpo-loko, é sète mon bann kamarade, é pétète na z’afèr pli itil pou fèr. Déza i énèrv amoin kan mi oi lo mèr mon komine i fors pa in pé déssi lénèrzi ronouvlab, é i profèr tiliz bann zénèrzi la pa ronouvlab. Kan mi pass dovan la méri é kan mi oi pa kansréti inn dé plak fotovoltayik, inn dé zéolyène, l’èr-la mi pans : "Aou, méssyé lo mèr, kont pi déssi mon biltin !".
Noré ankor in ta z’afèr pou dir, nana zanimo i viv la nuite… alor, akoz foute azot in gro limyèr dann zyé ? Bann plante na in rol la zourné, mé in rol la nuite ossi. Alor pou kossa i fé sa èk zot ? Demoun, la plipar i dor la nuite, akoz éklèr partou ? Lotrozour, moin té apré pansé : na pi zétoil dann syèl bann vil ! Mé in dalon la di amoin : zétoil nana, mé i oi pi ! Alor lé ga, alon manyé la limyèr konm k’i fo, san gaspiyé. Si i fo alime in bèk solman, akoz v’alime dis ? Zot, bann pouvoir piblik, la pa pars ni pèy i fo pèz konmsa déssi noute porte-moné. Zot galman fé z’ékonomi, gaspiy pa kouran, v’alé myé pou toulmoun !

Justin