Zot i ansouvien shanté Maxime Laoppe té i parl konpèr lo gèp, komèr lo gèp ? Sa té in shanté té i ral amoin bien. An touléka lo kozman « gèp i bross lo dan, i debout karté pou li gète atoué ». Lé vré sa lété dann tan l’avé in bonpé gèp é kisoi an vil, kisoi dann santyé, ou té riskab gingn in topok dsi out fron, sansa dann out né. Dé foi mèm té i boush aou in zyé. Kosa ou téi fé ? Bin sinploman pass in pé pisa dsi lo pikir pou fé bèss lo boss. Koméla in pé i di zot i fé l’alèrji é pikir gèp i rann azot malad. Dann tan nou téi koné pa sa ! Pikir gèp té i fé mal : fransh vérité ! Mé l’alèrji sa nou téi koné pa. In nouvo maladi ? In rèss la mikrobi ? Azot pou rofléshi la dsi.