Mi pans zot i koné kozman-la é pé sfèr moin mèm la fine anparl sa dann nout zournal témoignaz. Mé arien ! i di pa la pédagozi sé l’ar dir é rodir plizyèr foi in mèm zafèr si ou i vé k’i rant dann koko d’moun ? Donk mi ardi in n’ot foi é sé pou bien fé konprann lo moun isi dann nout péi, si ou i gingn fé in n’afèr, ou i di mi koné fé zafèr-la mé si ou i koné pa, ou i di, sinploman mi koné pa . Pars « mi koné »i aprann pi arien é « mi koné pa » néna in shans aprann dé shoz. Parèye pou lékol : mi di souvan mon pti zanfan, si ou la fine aprann out léson é si ou lé sir ou i koné ali, ou i di : « Moin la fine aprann mon léson é mi koné ali ». Si ou la pankor aprann pou vréman é si ou i koné pa pou vréman ou i di mi koné pa bien mon léson. Sa i lèss la port rouvèr pou ou aprann. Alé ! Mi kite azot rofléshi la dsi é ni artrouv pli d’van sipétadyé.