Médam zé Mésyé, la sosyété dann tout shoz i fo pa domann linposib. Lé vré in pé i pans zot lé bon a tou fèr, mé kan i mète azot o pyé d’lo mir, lé posib ké zot i ariv pa fèr sak zot téi kroi zot téi gingn fèr. Néna d’ot, konm lo gèp dann nout kozman, i koné zot kapasité é sak zot i gingn pa fèr. Pa konète son limite, mi pans sé in n’afèr inportan pars si ou i koné pa é si ou i vé avans an avan, pti pa-pti pa, ou i pé. Si ou pans ou gingn fé tout, momandoné ou i bite dsi in zo é la poin manyèr pou alé pli loin kansréti pars ou la ont rokonète in réalité : ou i gingn pa dir ou i gingn pa, sansa ou la pa kapab. Rokoné la vérité ! Kisa téi di ankor : « koné toi toi mèm ! » ? – Socrate té i di sa. Konmsa lé bon é konmsa ou i pé alé pli loin, mèm dousman-dousman. Alé ! Mi kite azot rofléshi la dsi é ni artrouv pli d’van. Sipétadyé.