Dimansh proshin, sé lozour Pak. Mon gran kamarad i di a moin, li sé in bon zanfan domoun, arkonidovan bon-dié, li fé karèm. Dikou, tout’ lo sominn sint’, li sar manz ryinklo gép, sé la sézon. Moin la fout’ à rir si télman, sa lé mantèr.

Lo kitsabouète, i di a moin sa, pou fé bav mon bouss, li konékoman mi ador so p’ti zandèt, ziska liss lo doi, kan mi fé frit’ a li. Epi, mon kamarad, li lé pa pli kouyon k’moin, li koné osi, koméla lo gépna pi. Afors mét do fé partou, sinonsa dézerban, nout’ ti guép péi la disparète… Lévré, i pé artrouv inndé ni, parsi – parla , mé i fo bien rodé é sipar kou d’shanss, ou i trouv invandèr lo gèp, dsi in bor d’shomin, gét si out posh si lé solid, 100 ou 150 éro, in filé détroi ni sélman. In zafèr ryink pou domoun an lér. Fantézikomsa, lé pa pou domoun oki. Mimm lo gép konzélatér, i sort’ Madégaskar, lé papou ninport ki.

Dir dann tan avan, navé lo gép partou, dann brousaye, dann pyé boi, ziska mimm dosou la saye la kaz. Mé là, té ki fo pa ravaz ali, sinonsa li rat’ pa ou, ék inn ti zargyion an plin dan la gèl, ou dann out bar d’kou. Mi pé dir à zot, lété pa in goyav… Domaz, talèr li va disparèt pou d’bon mimm. Fo pa bliyé, nout’ ti gép péi, i fé parti nout’ patrimoine réol. Dayèr, dopi lontan, nou sant’a li,« konpèr lo gép », « lo mèr gép », ni koz osi pou di « paréy lo rin guép » ou ankor « li lé an gép », épi d’ot kozman ankor.

Mon kozman, lé pa in blag, mé in zafér séryé. Ousanousava komsa ? La Rénion, la pi la Rénion. Kom di in sanson, ousa banna i vé ral a nou ?