Mézami, zot i koné kossa k’i apèl kou d’kongn ? Pétète pa, pars sa lété vré sirtou dann tan demoune téi marsh pyé tou ni. Dann in ka koma, tazantan téi ariv aou d’bate in kou d’pyé dann in koko d’galé k’i dépass é l’èr-la ou téi dékok in gro doi d’pyé, sansa plizyèr é mi rakonte pa zot la doulèr sa i raporte aou. Mwin la konète demoune téi tonb fèb avèk sa.

Sa sé lo vré kou d’kongn ! Rozman in pé rar zordi ké demoune i mète soulyé, mèm i mète savate lo doi. Dizon in tradission k’i disparé.

Mé kou d’kongn la pa solman koud’kongn fizik sé galman kou d’kongn la vi… kissoi in pèrte travaye, kissoi in riptir santimantal, épi toute sort movèz sirpriz konmsa k’i pouri la vi — é sa la pa pars wi mète soulyé ké sa i ariv pi aou. kou d’kongn la vi, mi panss sa i fé pli mal k’in kou d’kongn fizik é mi souète pa pèrsone gingn zafèr konmsa — mèm mon pir zènmi mé zènmi mwin la poin.

Alé ! Mi kite azot rofléshi la dsi é ni rotrouv pli d’van, sipétadyé.

Justin