Moi d’mars 2008, konm in bonb i pète dann syèl, Éric Fruteau, épi son bann dalon, i gingn zéléksyonn mèr dann Sin-Tandré. Zot i bate Virapoullé, l’om inbatab. Toutsuit la zistis i pans Éric, konm i pans lé z’ot mèr la gosh. Ala k’lo prokirèr i konvok ali épi i mète ali an légzamin pou in krime li la pa fé. Kèl krime ? Toulézour mil-troi san mète kib lo sal i dévèrs dan la mèr avèk toute déga sa i pé fé dan la natir. In krime pou vréman, mé la pa li la fé sa. Sak la fé sa, sé sak lété mèr avan li é la rès mèr plis trantan san fé lo néssésèr pou trouv in bon solisyon, é so boug-la sé lo Virapoullé.

Biensir la droite i ri. Biensir li roul a-tèr pou ri ! Pou zot sé konm si lo nouvo mèr i sava pèrde son plas, avan la finisyon son manda. Mazine in pé tousa milyon sa i koute ! Tèlmann milyon k’in komine konm Sintandré i pé pa nyabou fèr fas. Mé, mank de po, lékip la fé zoué son bann rézo, la fé travay son bann z’ékspèr, é troizan apré ala lo bon rézilta. Vantrodi dèrnyé la poz la promyèr pyèr lo nouvo stasyon nétoiyaz delo. An plis ké sa, la pa n’inport ékèl éstasyon. In gran kapasité pou prévoir la rogoumntasyon la popilasyon, avèk in batiman HQE, in bann pano solèr pou fé lékonomi dann l’énèrji. Arzout èk sa in tik-tak pou k’i san pa mové. Tousala va kout onz milyon l’ero é lo shantyé sar fine bouklé la finn l’ané 2012.

Konm de koi, nana k’i konstrui é nana k’i détrui. Nana k’i prévoi l’avnir, nana k’i gaspiy larzan par shikète. Final de kont sé la diférans rant sak i majine l’intéré la popilasyon, é sak i s’anfoutsa. Nana sak i konsidèr konm k’i fo lo pèp é sak i pans la popilasyon lé la aryink pou domann siouplé. I diré la dézyèm katégori lé pli sir d’gagné, mé konm di l’ot : sof koué pars gingn la viktoir épi gingn galo la pa la mèm shoz.

Justin