Médam, zé méssyé, la sossyété, koz èk mwin sé koz èk in kouyon é i diskite pa avèk in kouyon, i done ali rézon.

Mézami yèr matin mi ékoute la radio é mi antande dann sak téi doizète in sobatkoz mé fran sh vérité mi panss la tourn an lo d’boudin.Donk néna in madam i di èl lé né la Rényon mé èl i arète an franss.Donk èl i di lo mo « an goulèm  » in mo èl téi koné pa mé in moune la di aèl é sa i vé dir avoir son moi. ;

Mwin la parti rogarde dann diksyonèr Alain Armand épi galman dann somi-lo mo Daniel Honoré é sa téi vé dir :sé d’ète fatigué, avoir mové kor é la di sa i vien la lang malgash é sa i lé sinonime de « faye  ».

Mwin la panss shakinn i pé done in mo, in sanss li vé mé la pa pou sa ké lo sanss lé partazé par la majorité d’moune mé oila la suite.La suite pou èl sé sa : si mi plass in mo konmsa dann in lantrotien d’anbosh, i anbosh ar pa mwin ...

Alor mwin lé divizé-soi mi ropran lo kozman mwin la marke an-o la, épi mi di « i disjkite pa èk in kouyon... étsétéra, étsétéra". Soi mi panss la pèrssone la tète i blok pars sa i dépande dann kèl lang mi fé lo lantrotien, é lo nivo d’lang.Donk si lo légzaminatèr i di amwin koman i lé, sansa koman sa va, m’a réponde li « bien », sansa in pé trakassé mé sirman pa « an golème » pars lo lantrotien sar gaté dopi an komanssan.

Aprésa, la vi i pass pa arienk an lantrotien d’anbosh. Néna in ta sirkonstanss dan la vi é si sé pou prouv lo kréol lé initil dann in lantrotien d’anbosh ébin mon réponss sé dann kèl lang, avèk kèl partnèr, dann kèl sirkonstanss. Alor mézami alon ète sèryé si la lang kréol sé in lang nou la fé dopi dé zénérassyon, la pa bézoin gaskone ali mé pou diskité i fo ète sèryé.

In n’ot afèr, kan la madame la di «  an goulème » lanimatriss la panss èl téi rèst Angoulème é èl la domandé koman i lé lo tan laba. Sa la fé rir in pé, mwin pa mé antouléka mi di é mi rodi, noute lang sa sé in n’afèr sèryé é si i koz i fo ète sèryé... Sof si i vé plézanté mé astèrla nou lé pi dann lo rozistr diskission-déba-sobatkoz, mé dann lo rézistr plézantri.

Alé mé zami, nou va artrouvé pli d’van. Sipétadyé.